حقائق24
نهار سولو بنكيران شحال كيشد فالصالير ديالو كرئيس للحكومة، قال بللي كيتخلص 5 المليون فالشهر، لكن دارت ليام حتى كشفات مجلة “جون أفريك” الفرنسية على الصالير الحقيقي ديالو، وقالت بللي السي بنكيران كيشد خلصة أكثر بكثير من رؤساء الحكومات في شمال إفريقيا.. يعني كيشد كرمومة صحيحة أكثر من الصالير ديال ريئس الحكومة الجزائرية وحتى ديال تونس وزيد وزيد. بحيث كيوصل الصالير ديال بنكيران فالشهر إلى 9 المليون.. مليون كينطح مليون، داخلة فيها الخلصة والتعويض على السكن والنقل والخدم والأثات وانت غادي.. وهذا كيعني أن السي بنكيران كيشد لعاقة صحيحة أكثر بكثير حتى من الصالير ديال بعض رؤساء الحكومات في أوربا، بحال رئيس الحكومة الإسباني للي كيشد تقريبا 7 المليون و60 ألف ريال فالشهر.
المهم مبقاش أجر بنكيران هو 5 المليون كيف قال، بل ولا تقريبا الدوبل ديالو، وهذا كيعني أن ذيك القضية ديال التقشف غير هضرة وكلام.. حيت مدام القضية مخدومة، كلشي كيتبع الكرمومة. إيوا الكرمومة للي شد بنكيران من نهار ولا رئيس الحكومة في نونبر 2011، ولات ثروة، (الله يزيدو)، بحيث غير بوحدو شد فخمس سنين أكثر من نصف مليار سنتيم.. متفاجؤوش .. حيت القضية محسوبة.. دابا بنكيران كيشد 9 مليون سنتيم فالشهر، إلى ضربناها فـ12 شهر ولات 108 مليون سنتيم، وإلى ضربنا هاذ الرقم في 5، أي خمسنين غيعطينا 540 مليون سنتيم، يعني السي بنكيران تخلص غير بوحدو في الحكومة أكثر من نصف مليار سنتيم.. وهو مبلغ ميجمعو غير الفم في هاذ لبلاد السعيدة.
