جامع كلحسن صحافي القناة الثانية مقدم ومعد برنامج “مباشرة معكم” باين لينا قافز وكيدير برنامج مزيان ومن اللي فيديهم فالبرنامج فكاع القنوات ديالنا. غير هو ما فهمناش اش علاقتو بالبي جي دي.
رسل واحد الطلب غريب عجيب يستجيل يخرج من فم صحافي واعر. السيد رسل لواحد القيادي فحزب المصباح عبارة عن “طلب” قال فيه “من فضلك ابلغ رسالتي الى كل من تلتقيه من الاخوان في حزبكم بتجنب نشر الخلافات والغسيل الداخلي على مواقع التواصل الاجتماعي” ثم اضاف “والادلاء بتصريحات لاشباه صحافيين يبحثون عن الاثارة”. وختم “ناقشوا اموركم بينكم واختلفوا وتدافعوا لكن بعيدا عن اعين الشامتين. والله الموفق”.
نبداو بالنصيحة الاولى. السيد كينصح الحزب بحال ايلى خدام فيه مستشار باش ما ينشروش الخلافات. انت مالك اش حرك شطاطتك اش دخلك.
فين عمر شي صحافي قافز فالعالم كيطلب من شي حزب ما يخرجش خلافاتو. شكون قراك وعلمك. ثم ندوزو للنصيحة الثانية. كيفاش يمكن تصور صحافي كيطلب من سياسي ما يعطيش تصريحات وزادها عبارة “اشباه الصحافيين”. شكون انت اولا باش تحكم على اللي صحافي واللي ماشي صحافي. واش سوقك وانت اللي قاري وفاهم وبديتي ف”لوماتان” بالفرنسية ودزتي للعربية باللي كلشي الصحافيين باغيين لخبار. من بعد كل واحد يدير بيها ما بغى وينشرها من الزاوية اللي تعجبو وانت اش دخلك.
والقاتلة اللي كتبين باللي راك خدام معاهم هي “ناقشوا اموركم بينكم” وعبارة “تدافعوا بعيدا عن اعين الشامتين”. وقتاش وليتي يا ابو “تدافعو” خدام معاهم. شوف راه من حقك غير خاصك تميز ودير حدود بين الصحافي والسياسي وصافي.
